07‏/04‏/2012

ستراتیژییەتێكی نوێ‌ بۆ كار كردن لەسەر پرسی ئەنفال

ئاسۆ وەهاب


هەر چییەك لە پێشا‌و لە ماوەی رابردوودا لەم بوارەدا كرابێت دەستیان خۆش بێت، ئیدی حكومەت كردبێتی یان هەوڵی تاكە كەسی بووبێت یان هەر دەزگاو تاقمێكی تر . بەڵام ئەوەی بەردەوام سەرنجمان رادەكێشێت ئەوەیە ئەم هەوڵانە‌و ئەو كارانەی كە كراون زیاتر ئاڕاستەی تاكی كوردی كراوو كەمتر ئاڕاستی دەرەوە بووە، بڕوام وایە كەس نییە لەناو كورددا كۆمەڵە زانیارییەكی بەرایی لە بارەی ئەنفالەوە نەبێت .. ئەمە لە كاتێكدا زۆرێك زانیاری وردی لەسەر ئەم تاوانەی دژی مرۆڤایەتی هەیە، بۆ دەڵێم (دژی مرۆڤایەتی‌و ناڵێم دژی گەلی كورد لە باشوور) ئەمەیان مەبەستمە؟ لەبەر ئەوەی تا رۆژگاری ئەمڕۆ ئەم تاوانە (ئەنفال)‌و تاوانەكانی تری رژێمی بەعس دژ بە كورد وەكو تاوانێكی دژ بە مرۆڤایەتی هەناردەی دەرەوەمان نەكردوون، بگرە زیاتر وەك كێشەیەكی كوردی هەناردەمان كردووەتە دەرەوە ئەمەشیان قەبارەی تاوانەكە بچووك كردووەتە، لەم بوارە دا سەرنجی ئەزموونی جووەكان بدەن لە بارەی هۆلۆكۆستەوە، ئەوان بەدەوام لە رێگەی میدیاوە هەڕەشەكان لە سەر ئیسرائیل  بە هەڕەشەیەك دژ بە مرۆڤایەتی هەناردە دەكەنە دەرەوە نەك هەڕەشە بۆ سەر رەگەزو ئایینی جوو، بەردەوام وێنەی ئەو كەسانەی دژیان دەوستنەوە پەیوەست دەكەن بە وێنەی هیتلەرەوە، هەمیشە هێمای نازیزم لەسەر نێوچەوانی ئەو كەسانە دادەنێن كە هەڕەشەن لەسەر  دەوڵەتی ئیسرائیل . لەم كارەشیان رەنگە بە قەد كورد كەناڵی راگەیاندن‌و ئیمكانییەتی داراییان نەبێت (ئەگەر پارە بكەینە پێوەر) .
لێرەوە رەنگە پرسیاری ئەوە دروست بێت كە ئێمە چۆن بتوانین سیاسەتێكی نوێ‌ دابڕێژین بۆ ناساندنی ئەنفال بە جیهان، نەك هەر ئەمە بگرە بە كەمترین تێچوون لە ئاستی تاكدا نەك حكومەتیش ئەرشیفی تاوانەكان بكەین بۆ ئەوەی لەناو نەچن، ئەمەی دەیخەمە ڕوو داواكاری نییە لە حكومەت‌و نامەوێ‌ ئەوان بەشێك بن لێی، بۆ ؟ لەبەر ئەوەی بەرفراوانترین رووبەر بدەینە ئەو كەسانەی كە هەوڵی تاكە كەسیان هەیە لەم بوارە، حكومەتیش دەتوانێت ستراتیژی خۆی هەبێت ..
لە ئەمڕۆدا تۆڕی نێت‌و لە سایەی بەرهەمهاتنی چەمكی (میدیای خەڵك) دەتوانین گەورەترین پرۆژەی ناساندنی ئەنفال بە جیهان دەست پێ بكەین، ئەم پرۆسەیە تەنها پێویستی بە هەوڵی تاكە كەسی‌و كۆمپیوتەرێك‌و هێڵێكی ئەنتەرنێت هەیە، تاكەكان دەتوانن لە رێگەی دروستكردنی بلۆگێكەوە (نیمچە ماڵپەڕێكی كەسی) كە هیچی تیدا ناچێت (بەلاشە) تەواوی (وێنەكان – بەڵگەنامەكان – نەخشەكان -  یادەوەرییەكان – دیمانەكان ...هتد) لەو بلۆگە دانێن، بەو مەرجەی بە زمانە زیندووەكانی دونیا بنووسرێنەوە، واتا ئاسای كەسێك یان چەند كەسێك بلۆگەرێك دروست بكەن‌و بەو زمانانەی كە شارەزاییان تێدا هەیە ئەنفال بە جیهان بناسێنن، تا ژمارەی بلۆگەرەكان‌و زمانی تۆماركردن  زۆرتر بێت ژمارەی ئەو كەسانەی كە زانیارییەكانیان پێدەگات زیاتر بە مەش هۆشیارییەكی جیهانی لەبارەی ئەنفالەوە دروست دەكەین .
ئەم بابەتە چۆنە ؟

0 كۆمێنت:

إرسال تعليق